SAMÞYKKTIR LANDSSAMBANDS KÚABÆNDA

1. gr.

Samtökin heita Landssamband kúabænda, skammstafað LK. Heimili og varnarþing Landssambands kúabænda er á skrifstofu Bændasamtaka Íslands.

2. gr.

Tilgangur Landssambands kúabænda er að sameina þá, sem stunda nautgriparækt í atvinnuskyni, um hagsmunamál sín og vinna að hagsmunum þeirra innan Bændasamtaka Íslands með beinni aðild félagsmanna LK að Bændasamtökum Íslands.

3. gr.

Aðilar að Landssambandi kúabænda skulu vera þeir einstaklingar og lögaðilar sem skráðir eru í búgreinadeild Nautgripabænda innan Bændasamtaka Íslands hverju sinni.

Landssamband kúabænda ber ábyrgð á skuldbindingum sínum með eignum sínum, en ekki einstakir félagsmenn.

Einungis félagsmenn með fulla aðild, sbr. 1. mgr., og starfsmenn búgreinadeildar Nautgripabænda BÍ geta gegnt trúnaðarstörfum fyrir Landssamband kúabænda.

4. gr.

Aðild Landssambands kúabænda að félagasamtökum er háð samþykki aðalfundar.

5. gr.

Aðalfund skal halda árlega og hefur hann æðsta vald í öllum málefnum Landssambands kúabænda.

Fulltrúar á aðalfund Landssambands kúabænda skulu vera þeir sömu og kjörnir eru til setu á deildarfundi Nautgripabænda BÍ sama ár.

Félagsmenn greiða ekkert félagsgjald til Landssambands kúabænda.

Stjórnarmenn, varamenn þeirra og skoðunarmenn skulu hafa málfrelsi og tillögurétt á aðalfundi. Aðalfundurinn er opinn til áheyrnar öllum félagsmönnum sbr. 1. mgr. 3. gr. Óski fleiri aðilar en hér er getið um, eftir að sitja aðalfund með málfrelsi og tillögurétt skal það borið undir fundinn.

Á dagskrá aðalfundar skal vera:

1. Skýrsla stjórnar.
2. Afgreiðsla reikninga fyrir næst liðið almanaksár, fullnægjandi félagaskrá skal ávallt fylgja ársreikningi samþykktum á aðalfundi.
3. Tillögur og erindi til umræðu og afgreiðslu, sem borist hafa með löglegum fyrirvara.
4. Kosning tveggja skoðunarmanna til eins árs og einn til vara.
5. Fjárhagsáætlun til næsta árs.
6. Önnur mál.

Aðalfund skal halda í kjölfar deildarfundar Nautgripabænda BÍ. Um boðun fundarins gilda samþykktir Nautgripabænda BÍ. Aðalfundur er löglegur sé löglega til hans boðað.

6. gr.

Aukafund skal halda þyki stjórn Landssambands kúabænda sérstök nauðsyn bera til og jafnan þegar að minnsta kosti 1/4 félagsmanna óskar þess, enda sé þá fundarefni tilgreint. Aukafund skal boða með minnst 7 daga fyrirvara. Um rétt til fundarsetu á aukafundum gilda sömu reglur og á aðalfundi.

7. gr.

Stjórn Landssambands kúabænda skal skipuð sömu einstaklingum og sitja í stjórn Nautgripabænda BÍ. Formaður LK skal vera sá sami og gegnir starfi formanns búgreinadeildarinnar. Kjör formanns og stjórnar fara fram á deildarfundi Nautgripabænda og um þau gilda samþykktir Nautgripabænda BÍ.

Komi til þess að samstarfi Landssambands kúabænda og Bændasamtaka Íslands skuli hætt í núverandi mynd, að mati stjórnar LK eða minnst 2/3 félagsmanna LK, skal stjórn LK boða til aukafundar skv. 6. gr. þar sem taka skal málið fyrir. Sé samstarfi hætt skal fara fram stjórnarkjör. Kjósa skal þá formann, fjóra meðstjórnendur og tvo varamenn. Kjörgengi til þeirrar stjórnar skulu eiga allir félagsmenn Landssambands kúabænda og skulu stjórnarmenn kjörnir til næsta aðalfundar. Fyrst skal kosinn formaður og svo aðrir stjórnarmenn. Sú stjórn skal sjálf skipta með sér verkum.

8. gr.

Hlutverk stjórnar er að vinna að hagsmunum nautgripabænda innan Bændasamtaka Íslands í gegnum búgreinadeild, annast málefni LK milli félagsfunda og sjá um að þau séu jafnan í sem bestu horfi.

Undirskriftir þriggja stjórnarmanna þarf til að skuldbinda félagið.

9. gr.

Formaður stjórnar boðar til stjórnarfunda þegar ástæða þykir til og stjórnar þeim. Þó er honum skylt að boða fund ef tveir stjórnarmenn óska þess, enda sé þá fundarefnið tilgreint. Stjórnarfundur er lögmætur sé meirihluti stjórnar á fundi. Stjórn er heimilt að halda fundi með aðstoð fjarfundabúnaðar í gegnum rafræna miðla.

Stjórn Landssambands kúabænda skal skrá fundargerðir á fundum sínum. Stjórnarmenn skulu staðfesta afrit af fundargerðinni með undirskrift sinni og skal stjórn sjá til þess að þau afrit séu varðveitt með tryggilegum hætti.

10. gr.

Um alla fresti í aðdraganda aðalfundar LK gilda samþykktir Nautgripabænda BÍ. Á þetta við um formlega boðun fundarins, gildistöku félagatals, framboðsfrest fulltrúa, kosningar fulltrúa, hvenær fulltrúalisti skal liggja fyrir, innsendingar mála, hvenær og hvaða gögn skuli berast fulltrúum, hvenær nefndarstarf fer fram sem og hvenær forunnin þingmál skulu berast stjórn LK.

Aðalfundur LK getur þó ákveðið að taka til afgreiðslu mál sem koma fram eftir að tilgreindur frestur rennur út, ef meirihluti þingfulltrúa samþykkir.

11. gr.

Samþykktum þessum má aðeins breyta á aðalfundi eða aukafundi, sem boðaður er til þess sérstaklega. Tillögur þar um skulu kynntar félagsmönnum eigi síðar en 14 dögum fyrir aðalfund. Ná þær því aðeins fram að ganga að meirihluti fundarmanna greiði þeim atkvæði.

12. gr.

Leggist starfsemi Landssambands kúabænda niður og félaginu er slitið skulu eigur þess ganga til búgreinadeildar Nautgripabænda innan Bændasamtaka Íslands.

13. gr.

Ákvæði samþykkta þessara gilda frá og með 26. nóvember 2025..

Samþykkt á aðalfundi Landssambands kúabænda þann 26. nóvember 2025.